MALAIKA GRAY AIBUA MSISIMKO WA MAPENZI KUPITIA ‘MY FEVER’

Na Mwandishi Wetu, Dar es Salaam

MWIMBAJI na mtunzi wa nyimbo Mtanzania, Malaika Gray, ameanza safari yake rasmi ya muziki kwa kutoa wimbo wake wa kwanza, My Fever, akimshirikisha nyota wa Bongo Flava, Marioo.

Wimbo huo uliotoka Oktoba 30, 2026, umeandaliwa jijini Dar es Salaam, ambako pia video yake ilirekodiwa katika maeneo mbalimbali ya jiji hilo, ukiwemo ufukwe wa Bahari ya Hindi, masoko, vituo vya daladala na mitaa ya kawaida.

Malaika amesema ameamua kuanzia nyumbani kwa sababu Tanzania ndiyo sehemu yenye nafasi ya pekee katika maisha na safari yake ya muziki, ingawa dhamira yake ni kutengeneza nyimbo zitakazowafikia wasikilizaji duniani kote.

“Niliutengeneza nyumbani kwa sababu ndiko moyo wangu ulipo, Tanzania na bara ninalolijua na kulipenda. Lakini ninatengeneza muziki kwa ajili ya yeyote atakayeusikia. Nyumbani ndipo unapoanzia, si pale unapoishia,” amesema.

My Fever ni wimbo wa mapenzi unaoelezea mvuto na hisia zinazojengeka kati ya watu wawili, ukiunganisha midundo ya Afrobeats na Bongo Flava pamoja na ladha ya R&B, inayochangiwa na uzoefu wa Malaika kukulia katika nchi mbalimbali.

Msanii huyo amesema aliandika wimbo huo akilenga kuwasilisha hisia za mapenzi zinazochanganyika na mazingira ya kiangazi, huku akitaka sauti na ladha yake viakisi maisha ya Dar es Salaam.

Malaika aliandika wimbo huo kwa kushirikiana na Marioo, huku Abbah Process akihusika katika utayarishaji wa muziki huo.

Video ya My Fever ilirekodiwa kwa siku mbili jijini Dar es Salaam chini ya uongozi wa Joma, ikionesha mandhari na maisha ya kila siku ya jiji hilo. Marioo pia anaonekana katika video hiyo, iliyotolewa kupitia chaneli za wasanii hao wawili.

Kwa upande wake, Marioo amesema amefurahishwa na ushirikiano huo, akieleza kuwa Malaika ana kipaji na anaamini wataendelea kufanya kazi pamoja katika siku zijazo.

“Malaika ana kipaji cha kweli, na ilikuwa furaha kwangu kushiriki katika wimbo wake wa kwanza. Natarajia tutafanya kazi nyingi zaidi pamoja,” amesema Marioo.

Malaika, aliyekulia kati ya Tanzania na Afrika Kusini, kwa sasa anasomea Vocal Performance na Music Business katika Chuo cha Muziki cha Berklee kilichopo Boston, Marekani.

Kutolewa kwa My Fever ni mwanzo wa safari yake ya muziki, huku kukiwa na mipango ya kutoa kazi nyingine na kufanya ushirikiano wa kimuziki katika Afrika Mashariki na Kusini mwa Afrika hadi mwaka 2027.

Wimbo huo umetolewa kupitia Africori, kampuni inayohusishwa na Warner Music Group, na unapatikana katika majukwaa mbalimbali ya kidijitali ya kusikiliza muziki.

PSSSF YASISITIZIWA KUENDELEA NA UWEKEZAJI WENYE TIJA KWA WANACHAMA

Waziri wa Nchi Ofisi ya Waziri Mkuu-Kazi Ajira na Mahusiano Mhe Deus Sangu, akimpongeza Mkurugenzi wa Fedha Mfuko wa PSSSF Bw. Ally Yakuti, baada ya kukabidhiwa mfano wa hundi yenye thamani ya zaidi ya shilingi bilioni 1.07 ikiwa ni Gawio kutokana na uwekezaji wa Mfuko kwenye Mradi wa Rock City Mall ya jijini Mwanza. Hafla hiyo imefanyika jijini Dodoma Oktoba 27, 2026.

Waziri wa Nchi Ofisi ya Waziri Mkuu-Kazi Ajira na Mahusiano Mhe Deus Sangu, akizungumza wakati wa hafla hiyo.

Mwenyekiti wa Bodi ya Wadhamini ya Mwanza City Company Limited, ambaye pia ni Mkurugenzi Mkuu wa Mfuko wa PSSSF, Bw. Fortunatus Magambo akizungumza kwenye hafla hiyo

Mkurugenzi Mkuu wa Mfuko wa PSSSF Bw Fortunatus Magambo (kulia) akisalimiana na viongozi wa jiji la Mwanza wakati wa hafla ya kukabidhi Gawio kwa wabia wa Rock City Mall jijini Dodoma Oktoba 27, 2026

Dodoma, Oktoba 27, 2026

Waziri wa Nchi Ofisi ya Waziri Mkuu-Kazi, Ajira na Mahusiano, Mhe. Deus Sangu, amesema uwekezaji uliofanywa na Mfuko wa Hifadhi ya Jamii kwa Watumishi wa Umma PSSSF kwenye mradi wa Rock City Mall jijini mwanza ni ishara kwamba michango ya wanachama inalindwa, inakua na kurejesha faida kwa Taifa.

Mhe. Sangu ameyasema hayo jijini Dodoma Oktoba 27, 2026 wakati Kampuni ya Mwanza Rock City Ltd ambayo ndiyo inasimamia mradi huo ikitoa gawio la jumla ya Shilingi 1.18 bilioni kwa wabia wake watatu ambao ni; PSSSF ambayo imepokea Shilingi 1.07 bilioni; Halmashauri ya Jiji la Mwanza imepokea Shilingi 71.3 milioni na Manispaa ya Ilemela imepokea Shilingi 47.56 milioni. PSSSF ambayo ni taasisi iliyo chini ya Ofisi ya Waziri Mkuu (Kazi, Ajira na Mahusiano), ndiye mwekezaji mkuu katika mradi huo.

Hafla hiyo ilihudhuriwa pia na viongozi mbalimbali wakiwemo Mstahiki Meya wa Jiji la Mwanza Mhe. Constatine Sima, Mstaiki Meya wa Manispaa ya Ilemela Mhe. Sarah Ng’wani, na Mstaiki Meya wa Halmashauri ya Ilemela, Mhe Renatus Mulunga pamoja na Waheshimiwa Madiwani.

“Ninapenda kutoa pongezi za dhati kwa Bodi na Menejimenti ya Mifuko yetu ya Hifadhi ya Jamii, hususan PSSSF, kwa kazi kubwa mnayoifanya ya kuhakikisha michango ya wanachama inalindwa, inakua na kurejesha faida kwa Taifa. Leo hatupokei gawio tu, tunapokea uthibitisho kuwa mfumo wetu wa hifadhi ya jamii uko imara, unakua na unalipa.” Alisema Mhe. Sangu.

Mhe. Waziri Sangu alisema, Serikali ya Awamu ya Sita chini ya uongozi wa Mheshimiwa Dkt. Samia Suluhu Hassan, Rais wa Jamhuri ya Muungano wa Tanzania inaogozwa na Dira ya Maendeleo ya Taifa 2050. Dira hiyo inatuambia kuwa Tanzania tunayoitaka ni ya uchumi imara, wa viwanda, usio na umaskini, na wenye ajira zenye staha kwa kila Mtanzania.

“ Hivyo, jitihada hizi zinaonekana kwa wabia wote wa mradi huu wa Rock City Mall ambao ni PSSSF, Halmashauri ya Jiji la Mwanza na Halmashauri ya Ilemela kwa usimamizi mzuri wa mradi ambao pia umezalisha ajira. Bila usimamizi wenu pengine leo tusingekuwa hapa kushuhudia tukio hili kubwa kwa wabia hawa. Hongereni sana….!” Alisema.

Nawapongeza PSSSF kwa uwekezaji huu wenye tija kwa taifa letu, kwani nimeelezwa mpaka sasa asilimia 98 ya jengo lina wapangaji. Pamoja na kupendezesha jiji letu la Mwanza, mradi huu unanufaisha watu zaidi ya 1000 kupitia ajira za kudumu na za muda, kwa kufanya hivyo mnaunga mkono juhudi za Serikali kwa kuzalisha ajira kwa vijana wetu, alisema Mhe. Sangu.

Aidha Mhe. Sangu ametoa wito kwa PSSSF na taasisi nyingine zilizo chini ya Ofisi ya Waziri Mkuu (Kazi, Ajira na Mahusiano) kuhakikisha wanafuata miongozo ya uwekezaji inayotolewa na Benki Kuu ya Tanzania pamoja na sera za uwekezaji za taasisi husika ili kuweza kufanya uwekezaji wenye tija kama huu ambao leo tunashuhudia ukitoa gawio kwa wabia wake.

“Lengo la kuwekeza ni kulinda thamani ya michango ya Wanachama ili wanapokuja kustaafu waweze kulipwa mafao ambayo ni zaidi ya michango yao waliyokuwa wanachangia katika Mfuko, hivyo, kutokana na mafanikio ya mradi huu tunaamini sehemu hii ya gawiwo itachangia katika kuwafanya wanachama wa PSSSF KULIPWA JANA.” Alisisitiza.

Kwa upande wake, Mkurugenzi Mkuu wa Mfuko wa PSSSF, ambaye pia ni Mwenyekiti wa Bodi ya Wadhamini ya Mwanza Rock City Company Limited, Bw. Fortunatus Magambo, amelinganisha tukio hilo na siku ya mavuno.

“Hakika ile mbegu tuliyopanda, ilimea vyema na hatimaye leo tunavuna tulichopanda, hakika leo ni siku muhimu sana.” Alisema Bw. Magambo.

Bw. Magambo alisema, Rock City Mall ina mchango kwa jamii na maendeleo ya Jiji la Mwanza kwa kuwa kituo cha huduma mbalimbali, ambapo faida zake ni pamoja na; Kurahisisha upatikanaji wa huduma, inakusanya huduma mbalimbali katika eneo moja, zikiwemo maduka, huduma za benki na migahawa mbalimbali.

“Hii huwasaidia wananchi kuokoa muda na kurahisisha shughuli zao, Rock City Mall inatoa nafasi za biashara na ajira, inatoa maeneo ya kufanyia biashara na kuchangia fursa za ajira kupitia maduka, migahawa na huduma nyingine zinazopatikana hapo.

Aidha, Bw. Magambo alisema, PSSSF inawekeza ili kulinda thamani ya michango ya Wanachama ili wanapokuja kustaafu waweze kupata mafao zaidi ya michango yao waliyokuwa wanachangia katika Mfuko.

“Uwekezaji wa Mfuko unaongozwa na Mwongozo wa Uwekezaji kutoka Benki Kuu ya Tanzania pamoja na Sera ya Uwekezaji ya Mfuko. Sehemu kubwa ya uwekezaji upo katika dhamana za serikali, hisa za kampuni na amana za mabenki na si kwenye majengo kama wengi wanavyodhani.” Alisisitiza.

PSSSF YAHAMASISHA AFYA BORA NA TIJA KAZINI KUPITIA BONANZA LA WAAJIRI

Naibu Waziri wa Nchi Ofisi ya Waziri Mkuu-Kazi, Ajira na Mahusiano, Mhe. Dkt. Eveline Munisi (kushoto) akimkabidhi Meneja wa Mfuko wa PSSSF, Kanda ya Ilala, Bi. Amina Kassim cheti cha shukrani kwaniaba ya mfuko kwa kuwa miongoni mwa Taasisi wezeshi Tamasha la Tano la Waajiri Afya Bonanza kwenye Viwanja vya Chuo Kikuu Cha Dar Es Salaam, Oktoba 24, 2026.

Afisa Mkuu wa Huduma kwa Wateja Mfuko wa PSSSF Bi. Nelusigwe Mwalugaja (kushoto), akimuhudumia mteja kujiunga na PSSSF Kiganjani katika banda la mfuko kwenye Bonanza la Tano la Afya la Waajiri, maarufu kama Waajiri Health Bonanza, lililofanyika Oktoba 24, 2026, katika Viwanja vya Chuo Kikuu cha Dar es Salaam, eneo la Mlimani, jijini Dar es Salaam.

Naibu Waziri wa Nchi Ofisi ya Waziri Mkuu-Kazi, Ajira na Mahusiano, Mhe. Dkt. Eveline Munisi akimvisha medali Afisa Matekelezo Mwandamizi wa Mfuko wa PSSSF Bw. Salum salum baada ya kushina mbio za kukimbia na glasi ya maji kwenye Bonanza la Tano la Afya la Waajiri, maarufu kama Waajiri Health Bonanza, lililofanyika Oktoba 24, 2026, katika Viwanja vya Chuo Kikuu cha Dar es Salaam, eneo la Mlimani, jijini Dar es Salaam.

Naibu Waziri wa Nchi Ofisi ya Waziri Mkuu-Kazi, Ajira na Mahusiano, Mhe. Dkt. Eveline Munisi akimpongeza mfanyakazi Mwanafunzi wa Mfuko wa PSSSF Bi. Prudensiana sondoka, baada ya kumvisha Medali baada ya kushina mbio za kukimbia na glasi ya maji kwenye Bonanza la Tano la Afya la Waajiri, maarufu kama Waajiri Health Bonanza, lililofanyika Oktoba 24, 2026, katika Viwanja vya Chuo Kikuu cha Dar es Salaam, eneo la Mlimani, jijini Dar es Salaam.

Meneja wa Mfuko wa PSSSF, Kanda ya Ilala, Bi. Amina Kassim (katikati) na baadhi ya watumishi wa Mfuko Huo, akiwa amekamata cheti cha shukrani kwa Mfuko kuwa miongoni mwa Taasisi wezeshi Tamasha la Tano la Waajiri Afya Bonanza kwenye Viwanja vya Chuo Kikuu Cha Dar Es Salaam, Oktoba 24, 2026

Naibu Waziri wa Nchi Ofisi ya Waziri Mkuu-Kazi, Ajira na Mahusiano, Mhe. Dkt. Eveline Munisi, akizungumza katika Bonanza la Tano la Waajiri Afya Bonanza kwenye Viwanja vya Chuo Kikuu Cha Dar Es Salaam, Oktoba 24, 2026

Naibu Waziri wa Nchi Ofisi ya Waziri Mkuu-Kazi, Ajira na Mahusiano, Mhe. Dkt. Eveline Munisi (Wapili kushoto) akimsikiliza Meneja wa Mfuko wa PSSSF, Kanda ya Ilala, Bi. Amina Kassim alipotembelea Banda la Mfuko kwenye Maonesho ya Bonanza la Tano la Afya la Waajiri 'Waajiri Afya Bonanza' kwenye Viwanja vya Chuo Kikuu Cha Dar Es Salaam, Oktoba 24, 2026.

Mfuko wa Hifadhi ya Jamii kwa Watumishi wa Umma (PSSSF) umeshiriki katika Bonanza la Tano la Afya la Waajiri, maarufu kama _Waajiri Health Bonanza,_ lililofanyika Oktoba 24, 2026, katika Viwanja vya Chuo Kikuu cha Dar es Salaam, eneo la Mlimani, jijini Dar es Salaam.

Bonanza hilo ambalo mgeni rasmi alikuwa ni Naibu Waziri Ofisi ya Waziri Mkuu-Kazi Ajira na Mahusiano Mhe Dkt. Evelin Munisi liliratibiwa na Chama cha Waajiri Tanzania (ATE), lengo likiwa ni kuhamasisha wafanyakazi kujenga utamaduni wa kufanya mazoezi kwa ajili ya kuimarisha afya zao, kuongeza tija kazini na kukuza uhusiano mwema miongoni mwa waajiri na taasisi mbalimbali nchini kupitia michezo na burudani.

Mhe. Dkt. Munisi alizindua Bonanza hilo kwa kupiga mpira, kisha kutembelea mabanda ya Maonesho.

Akiwa katika Banda la PSSSF, Mhe. Dkt. Munisi alipokelewa na Meneja wa Mfuko wa PSSSF Kanda ya Ilala Bi. Amina Kassim.

Akizungumza mbele ya Mhe. Dkt. Munisi, Meneja huyo wa PSSSF , alisema kuwa ushiriki wa Mfuko katika bonanza hilo ni sehemu ya kuimarisha uhusiano na wadau wake, huku ukiwapa washiriki fursa ya kupata elimu kuhusu huduma za hifadhi ya jamii.

Alisema kuwa pamoja na kushiriki katika michezo mbalimbali, pia Mfuko unatoa huduma na elimu kuhusu hifadhi ya jamii.

"Tunafurahi kuungana na wadau wetu katika bonanza hili. Tunatoa elimu kuhusu huduma zetu, hususan mafao yanayotolewa na Mfuko, chini ya kaulimbiu yetu ya 'Tunalipa jana', ambayo imeufanya mfuko kwenda _Extra Mile_ katika ulipaji wa Mafao." alisema Bi. Kassim.

Aidha PSSSF imefanikiwa kutwaa medali mbili katika mbio za kukimbia na glasi ya maji kwa wanawake na wanaume, ambapo Mhe. Dkt. Munisi aliwakabidhi tuzo washindi hao.

SERIKALI KUANDAA FURSA ZA UTARAJALI KWA VIJANA 30,000

Na Mwandishi Wetu – Dar es Salaam.

Serikali inaendelea kuweka mkazo maalum kwenye kuboresha mfumo wa uratibu na upatikanaji wa mafunzo ya utarajali (internship) kwa kuwapatia wahitimu wa kada mbalimbali, uzoefu na ujuzi unaohitajika kwa lengo la kuwafanya wahitimu hao kuwa shindani katika soko la ajira la ndani na nje ya nchi.

Akiongoza kikao cha Makatibu Wakuu kilichofanyika Ofisi ndogo ya Waziri Mkuu jijini Dar es Salaam Oktoba 22, 2026, Katibu Mkuu, Ofisi ya Waziri Mkuu, Sera, Bunge, Uratibu na Wenye Ulemavu, Dkt. Jim Yonazi, amesema maboresho yanayoendelea kufanyika ni sehemu ya utekelezaji wa maelekezo ya Makamu wa Rais wa Jamhuri ya Muungano wa Tanzania, Mhe. Deogratius Ndejembi, aliyoyatoa wakati akimwakilisha Rais wa Jamhuri ya Muungano wa Tanzania, Mhe. Dkt. Samia Suluhu Hassan, kwenye kikao kazi cha wenyeviti wa bodi na watendaji wakuu wa taasisi na mashirika ya umma (C-COEs Forum 2026) tarehe 28 Septemba, 2026 jijini Arusha.

Katika kikao kazi cha wenyeviti wa bodi na watendaji wakuu wa taasisi na mashirika ya umma, Mhe. Makamu wa Rais alielekeza kuandaliwa kwa mpango wa mafunzo kwa vitendo utakaowawezesha angalau vijana 10,000 kupata uzoefu katika mashirika ya umma na wengine 20,000 kwenye sekta binafsi, ikiwa ni sehemu ya utekelezaji wa Dira ya Taifa ya Maendeleo 2050, hususani nguzo ya pili inayosisitiza maendeleo ya watu na rasilimali watu nchini.

Katika kikao hicho cha Makatibu Wakuu, Dkt. Yonazi amesema kuwa Serikali inaendelea kuweka kipaumbele kikubwa kwenye masuala ya mafunzo kwa vitendo (internship) kwa wahitimu ili kuziba pengo la kutokuwa na uzoefu, na kuwapa wahitimu hao uwezo wa kuunganisha elimu ya darasani na uhalisia wa mazingira ya kazi pamoja na kuongeza ushindani kwenye soko la ajira.

“Mafunzo ya ujuzi na uzoefu wa kazi yanapatikana kupitia taasisi mbalimbali za Serikali, vyuo vya ufundi, na programu za kitaifa zinazolenga kuwaandaa vijana kuwa shindani katika soko la ajira”, ameeleza Dkt. Yonazi.

Kikao hicho kiliwashirikisha Makatibu Wakuu wa kisekta kutoka Ofisi ya Rais, Menejimenti ya Utumishi na Utawala Bora, Ofisi ya Rais Mipango na Uwekezaji, Ofisi ya Rais Maendeleo ya Vijana, Ofisi ya Waziri Mkuu-Tawala za Mikoa na Serikali za Mitaa, Ofisi ya Waziri Mkuu - Kazi, Ajira na Mahusiano, Wizara ya Fedha, Wizara ya Kilimo, Wizara ya Elimu, Sayansi na Teknolojia pamoja na Wizara ya Ujenzi.

JAB YASHIRIKISHA DSJ KATIKA KUINUA VIWANGO VYA TAALUMA YA HABARI

Na Mwandishi Wetu.

Wanafunzi wa uandishi wa habari wamehimizwa kutotosheka na elimu ya ngazi ya cheti au stashahada, bali waendelee kujiendeleza hadi kufikia ngazi za juu zaidi ili kujenga uwezo, weledi na ushindani katika taaluma hiyo.

Wito huo umetolewa tarehe 22 Oktoba, 2026, na Afisa Habari Mkuu kutoka Bodi ya Ithibati ya Waandishi wa Habari (JAB), Bw. Prudence Constantine, wakati wa ziara ya maafisa wa Bodi katika Chuo cha Uandishi wa Habari Dar es Salaam (Dar es Salaam School of Journalism-DSJ).

Ziara hiyo imelenga kujifunza kuhusu mazingira na mifumo ya utoaji wa mafunzo ya uandishi wa habari, kuimarisha ushirikiano kati ya JAB na chuo hicho, pamoja na kuhakikisha mafunzo yanayotolewa yanawaandaa wanafunzi kukidhi viwango vya elimu, ithibati, maadili na weledi vinavyohitajika katika taaluma ya uandishi wa habari.

Akizungumza na wanafunzi wanaosoma ngazi ya cheti, Constantine amesema taaluma ya uandishi wa habari inahitaji watu wenye elimu, ujuzi na maarifa mapana ili waweze kukabiliana na mabadiliko na changamoto zinazojitokeza katika utekelezaji wa majukumu yao.

Amewataka wanafunzi hao kujikita katika masomo, kujenga utamaduni wa kujifunza na kuendelea kupanua maarifa yao, akieleza kuwa maendeleo ya teknolojia na mabadiliko katika tasnia ya habari yanahitaji Waandishi wa Habari wenye uwezo wa kuendana na wakati.

Katika mazungumzo hayo, maafisa wa JAB walikutana na wanafunzi na wakufunzi wa DSJ na kujadiliana kuhusu mafunzo, viwango vya taaluma na umuhimu wa kuimarisha mazingira ya ujifunzaji na kuwaandaa wanafunzi kutekeleza majukumu ya kihabari kwa kuzingatia weledi na maadili.

Kwa upande wao, wakufunzi wa DSJ wameiomba JAB kuendelea kutekeleza majukumu yake ya kusimamia na kuimarisha taaluma ya uandishi wa habari, ili kuhakikisha Waandishi wa Habari wanazingatia maadili, weledi na misingi ya taaluma hiyo.

Ziara hiyo ni sehemu ya juhudi za JAB za kuimarisha ushirikiano na vyuo vinavyotoa mafunzo ya uandishi wa habari, kwa lengo la kuboresha maandalizi ya wataalamu na kuinua viwango vya taaluma nchini.

Serikali yataka Udhibiti Madhubuti wa Mapato yasiyo ya Kodi

Naibu Katibu Mkuu, Wizara ya Fedha, Bw. Elijah Mwandumbya akifungua kikao cha ngazi ya wataalam cha Mafungu yote yanayokusanya mapato yasiyo ya kodi kilichofanyika jijini Dodoma katika ukumbi wa Kambarage, Treasury Square.

Baadhi ya wajumbe wa kikao cha ngazi ya wataalam cha mafungu yote yanayokusanya mapato yasiyo ya kodi wakifuatilia mawasilisho mbalimbali wakati wa kikao hicho kilichofanyika jijini Dodoma katika ukumbi wa Kambarage, Treasury Square.

Mkurugenzi wa Idara ya Usimamizi wa Mifumo ya Fedha na Tehama, Wizara ya Fedha, Dkt. John Sausi, akitoa maelezo mafupi wakati wa kikao cha ngazi ya wataalam cha mafungu yote yanayokusanya mapato yasiyo ya kodi kilichofanyika jijini Dodoma katika ukumbi wa Kambarage, Treasury Square.

Mkurugenzi wa Idara ya Mipango, Wizara ya Fedha, Bw. Amoury Amoury, akiteta jambo na Afisa Usimamizi wa Fedha Mkuu, Idara ya Uchambuzi wa Sera Bi. Emerensiana Nyanda, wakati wa kikao cha ngazi ya wataalam cha mafungu yote yanayokusanya mapato yasiyo ya kodi kilichofanyika jijini Dodoma katika ukumbi wa Kambarage, Treasury Square.

Sekretarieti wakichukua maoni kutoka kwa wachangiaji wa maoni wakati wa kikao cha ngazi ya wataalam cha mafungu yote yanayokusanya mapato yasiyo ya kodi kilichofanyika jijini Dodoma katika ukumbi wa Kambarage, Treasury Square.

Baadhi ya wajumbe wa kikao cha ngazi ya wataalam cha mafungu yote yanayokusanya mapato yasiyo ya kodi wakifuatilia mawasilisho mbalimbali wakati wa kikao hicho kilichofanyika jijini Dodoma katika ukumbi wa Kambarage, Treasury Square.

Afisa Usimamizi wa Fedha, Idara ya Uchambuzi wa Sera, Wizara ya Fedha, Bw. David Massawe, akifanya wasilisho kuhusu taarifa ya utekelezaji wa mkakati wa mud awa kati wa ukusanyaji wa mapato wakati wa kikao cha ngazi ya wataalam cha mafungu yote yanayokusanya mapato yasiyo ya kodi kilichofanyika jijini Dodoma katika ukumbi wa Kambarage, Treasury Square.

Meneja wa Mfuko wa Maendeleo ya Kilimo, Wizara ya Kilimo, Bi. Maria Mtui, akifanya wasilisho kuhusu ukusanyaji wa mapato yasiyokuwa ya kikodi katika Sekta ya Kilimo, wakati wa kikao cha ngazi ya wataalam cha mafungu yote yanayokusanya mapato yasiyo ya kodi kilichofanyika jijini Dodoma katika ukumbi wa Kambarage, Treasury Square.

Mkurugenzi Msaidizi, Ofisi ya Msajili wa Hazina Bw. Joseph Mwaisemba, akifanya wasilisho kuhusu taarifa ya makusanyo ya mapato yasiyo ya kodi wakati wa kikao cha ngazi ya wataalam cha mafungu yote yanayokusanya mapato yasiyo ya kodi kilichofanyika jijini Dodoma katika ukumbi wa Kambarage, Treasury Square.

Mhasibu Mkuu, Wizara ya Mifugo na Uvuvi Bw. Richard Masini, akifanya wasilisho kuhusu taarifa ya makusanyo ya mapato yasiyo ya kodi wakati wa kikao cha ngazi ya wataalam cha mafungu yote yanayokusanya mapato yasiyo ya kodi kilichofanyika jijini Dodoma katika ukumbi wa Kambarage, Treasury Square.

Farida Radhaman na Josephine Majura, WF, Dodoma

Serikali imeziagiza taasisi zote zinazohusika na ukusanyaji wa mapato yasiyo ya kodi kuimarisha mifumo ya ukusanyaji, usimamizi na ufuatiliaji wa fedha ili kuhakikisha kila shilingi inayostahili kukusanywa inaingia katika mifumo rasmi ya Serikali na kusaidia kugharamia huduma za jamii pamoja na miradi ya maendeleo.

Wito huo umetolewa jijini Dodoma na Naibu Katibu Mkuu, Wizara ya Fedha, Bw. Elijah Mwandumbya, wakati akifungua kikao cha wataalum cha mafungu yanayohusika na ukusanyaji wa mapato yasiyo ya kodi, kwa lengo la kupitia taarifa za makusanyo, kujadili changamoto na kuandaa mapendekezo yatakayosaidia kuboresha usimamizi wa mapato ya Serikali.

Bw. Mandumbya alisisitiza kuwa kuongeza viwango vya tozo au kubaini vyanzo vipya vya mapato pekee hakutoshi bila kuimarisha mifumo ya ukusanyaji na kudhibiti mianya ya upotevu wa fedha za umma.

“Ni muhimu kuhakikisha kila shilingi inayostahili kukusanywa na Serikali inaingia katika mifumo rasmi. Tunapaswa kuimarisha usimamizi na ufuatiliaji wa mapato ili kuzuia upotevu wa fedha ambazo ni muhimu katika utekelezaji wa mipango ya Serikali na utoaji wa huduma kwa wananchi,” alisisitiza Bw. Mwandumbya.

Alisema kuwa juhudi za kuongeza mapato zinapaswa kuzingatia hali halisi ya uchumi na kulinda mazingira yanayowawezesha wananchi kufanya shughuli halali za kiuchumi.

Aliongeza kuwa ukusanyaji wa mapato yasiyo ya kodi ni jukumu la pamoja linalohitaji ushiriki wa taasisi zote katika hatua za upangaji wa makadirio, utekelezaji, ufuatiliaji na tathmini huku akiwasihi kutumia kikao hicho kuweka maazimio yenye mikakati inayotekelezeka, majukumu yaliyo wazi na utaratibu madhubuti wa kufuatilia matokeo.

“Lengo letu si kuongeza mapato pekee, bali pia kuhakikisha hakuna fedha zinazopaswa kuingia Serikalini zinazopotea kutokana na udhaifu wa mifumo au usimamizi usioridhisha. Kila taasisi inapaswa kutekeleza wajibu wake na kuhakikisha maazimio yanayokubaliwa yanafuatiliwa hadi kuleta matokeo,” alieleza Bw. Mwandumbya.

Alisema Takwimu za makusanyo ya mwaka wa fedha 2025/26 zinaonesha kuwa mchango wa mapato yasiyo ya kodi unatofautiana kwa kiasi kikubwa kati ya taasisi za Serikali, huku baadhi zikichangia sehemu kubwa ya mapato na nyingine zikiwa na mchango mdogo.

Bw. Mwandumbya alisema takwimu hizo zinaonesha umuhimu wa taasisi zenye mchango mdogo kupitia upya mikakati yao na kujifunza kutoka kwa taasisi zinazofanya vizuri.

“Bado kuna fursa nyingi za mapato ambazo hazijafikiwa kikamilifu. Ni muhimu kwa kila taasisi kubaini fursa hizo na kuimarisha usimamizi ili kuongeza mchango wake katika mapato ya Serikali,” alisisitiza Bw. Mwandumbya.

Bw. Mwandumbya alisema pamoja na changamoto hizo, mapato yasiyo ya kodi yameendelea kuonesha ongezeko. Katika kipindi cha Julai hadi Agosti cha mwaka wa fedha 2026/27, Serikali ilikusanya shilingi trilioni 1.06 sawa na ufanisi wa asilimia 114.7 ya lengo la kipindi hicho.

Alisema makusanyo hayo yanaonesha ukuaji wa asilimia 34.4 ikilinganishwa na kipindi kama hicho mwaka 2025, na kubainisha kuwa katika mwaka wa fedha 2025/26, Serikali ilikusanya shilingi trilioni 4.3175 kati ya lengo la shilingi trilioni 4.682, sawa na ufanisi wa asilimia 92.2.

Kwa upande wake, Mkurungenzi wa Idara ya Mipango wa Wizara ya Fedha, Bw. Amoury Amoury ambaye alitoa maelezo ya awali kuhusu kikao hicho kwa niaba ya Kamishna wa Idara ya Uchambuzi wa Sera, Wizara ya Fedha, Dkt. Remidius Ruhinduka, alisema katika kikao hicho, washiriki watapata fursa ya kutathmini utekelezaji wa maazimio ya kikao kilichopita pamoja na kujadili mwenendo wa ukusanyaji wa mapato yasiyo ya kodi na usajili wa vyanzo vya mapato.

Alisema kikao hicho kililenga kupata mapendekezo ya kitaalamu yanayosisitiza umuhimu wa kuimarisha usimamizi wa vyanzo vilivyopo, kubaini fursa mpya za mapato na kuongeza uelewa wa wadau kuhusu taratibu za usajili, ili kuboresha usimamizi na ukusanyaji wa mapato yasiyo ya kodi kwa kusaidia kupanua wigo wa ukusanyaji wa mapato na kuongeza mchango wa mapato yasiyo ya kodi katika kugharamia shughuli za Serikali na miradi ya maendeleo.

Naye Mkurugenzi wa Mifumo ya Usimamizi wa Fedha na Huduma za Tehama, Dkt. John Sausi alielezea hatua mbalimballi zinazofanywa na Serikali kupitia Wizara ya Fedha katika kuboresha matumizi ya mifumo ya kidijitali, ikiwemo mfumo wa Control Number, ili kuongeza ufanisi na kurahisisha malipo ya huduma za Serikali.

Dkt. Sausi alisema kuwa baadhi ya changamoto zinazoathiri ufanisi wa mifumo hiyo ni pamoja na kuchelewa kwa taasisi kufanya upatanisho wa miamala (reconciliation) na hitilafu za kiufundi zinazoweza kujitokeza katika mifumo ya benki.

Alisema taasisi za Serikali zimetakiwa kufanya uhakiki wa miamala na taarifa za akaunti zao kwa wakati, huku ushirikiano kati ya Serikali, benki na wadau wa mifumo ukiendelea kuimarishwa ili kuhakikisha mapato yote yanayostahili yanakusanywa na kurekodiwa ipasavyo.

Kikao hicho ni sehemu ya maandalizi ya kikao kazi cha Maafisa Masuuli wa mafungu yote yanayokusanya mapato yasiyo ya kodi ili kwa pamoja kufanya tathmini ya ukusanyaji wa mapato kwa mwaka wa fedha 2025/26 na mikakati ilyowekwa kwa kila Fungu ili kufikia malengo ya mapato ya mwaka 2026/27 kinachotarajia kufanyika hivi karibuni.

(Picha na Kitengo cha Mawasiliano Serikalini, WF, Dodoma)