IMBEJU YATOA MIKOPO YA SHILINGI MILIONI 555.6 KWA WAJASILIAMALI KIGOMA

Programu ya Imbeju inayotekelezwa na Taasisi ya CRDB Bank Foundation imetoa zaidi ya shilingi milioni 555.6 kwa vikundi 58 vya wajasiliamali mkoani Kigoma.

Mikopo hiyo itokanayo na asilimia 10 ya mapato ya ndani ya halmashauri imekabidhiwa na Mkuu wa Wilaya Kigoma, Dkt. Rashid Chuachua akiwa sambamba na Meneja Mwandamizi wa Uwezeshaji wa CRDB Bank Foundation, Baraka Kilayo.

Halmashauri ya Manispaa ya Kigoma Ujiji ni kati ya mamlaka 10 za serikali za mitaa zilizochaguliwa na serikali kutoa mikopo jumuishi kwa wajasiriamali kwa kuzishirikisha taasisi za fedha.

Baada ya kutolewa kwa hundi hiyo, kunaifanya Halmashauri ya Wilaya ya Kigoma kufikisha kiasi cha zaidi ya shilingi milioni 600 ilizozitoa kwa vikundi vya wanawake, vijana na makundi maalumu ambao ndio wanufaika wakuu wa mikopo hiyo.

Mkuu wa wilaya Kigoma Dkt. Rashid Chuachua akizungumza na vikundi vya Wanawake, vijana na walemavu waliopokea mikopo inayotolewa na Halmashauri ya manispaa ya Kigoma Ujiji kupitia Benki ya CRDB chini ya Program yake bunifu ya imbeju.

Meneja Mwandamizi wa Uwezeshaji wa CRDB Bank Foundation, Baraka Kilayo akizungumza wakati wa hafla ya benki hiyo kukabidhi mikopo kwa wajasiliamali wa manispaa ya Kigoma kutoka mikopo ya asilimia 10 inayotolewa na Halmashauri hiyo kupitia Benki ya CRDB.

Mkuu wa wilaya Kigoma Sk.Rashid Chuachua (mwenye suti ya Bluu) akikabidhi hundi kwa vikundi vya Wanawake, vijana na walemavu mikopo inayotolewa na Halmashauri ya manispaa ya Kigoma Ujiji kupitia Benki ya CRDB kupitia Program ya imbeju.

KIKOSI CHA TAIFA CHA NGUMI CHAJIANDAA KUIPEPERUSHA BENDERA YA TANZANIA KENYA

Na Mwandishi Wetu, Dar es Salaam

Shirikisho la Ngumi Tanzania (BFT) limetangaza kikosi cha timu ya taifa ya mabondia 26 pamoja na benchi la ufundi lenye watu 9, kitakachoiwakilisha nchi katika Mashindano ya Kanda ya 3 Afrika yatakayofanyika Nairobi, Kenya kuanzia Oktoba 14 hadi 25, 2025.

Taarifa iliyotolewa jana na Katibu Mkuu wa BFT, Makore Mashaga, imeeleza kuwa kikosi hicho kimeteuliwa kufuatia mashindano ya Klabu Bingwa ya Taifa yaliyomalizika hivi karibuni, na sasa kiko tayari kupambana ili kuipatia Tanzania heshima katika jukwaa la kimataifa.

Mashindano ya Nairobi yanatarajiwa kuwa jaribio la kwanza la kimataifa kuelekea maandalizi ya michezo ya Jumuiya ya Madola (Commonwealth Games) yatakayofanyika Glasgow, Scotland kuanzia Julai 23 hadi Agosti 2, 2026, ambapo Tanzania itashiriki rasmi.

Kwenye orodha ya mabondia walioteuliwa, upande wa wanaume unaongozwa na Juma Athumani (MMJKT) atakayepigania uzito wa 46-48kg (minimumweight), Azizi Chala (Ngome) uzito wa 48-51kg, na Faki Issa wa Jeba Tanga (bantamweight). Pia wamo bondia machachari kama George Costantino (Ngome), Ezra Paulo (Ngome), Rashid Mrema (Polisi), pamoja na Maximillian Patrick (MMJKT) atakayepigania uzito wa juu kabisa, super heavyweight (92kg+).

Kwa upande wa wanawake, timu inajivunia vipaji vya mabondia kama Martha Kimaro (Ngome), Aisha Hamisi (JKT), Sarafina Fusi (Ngome), pamoja na Veronica Ebroni (Magereza) ambaye atawakilisha taifa kwenye uzito wa juu (heavyweight).

Aidha, benchi la ufundi linaongozwa na Samwel Kapungu (Mwalimu Mkuu - BFT) akisaidiana na Mzonge Hassani (Ngome), pamoja na walimu wengine kutoka MMJKT, Ngome na Polisi. Pia kuna waamuzi, matron Fatuma Manzi (MMJKT) na daktari wa timu Mussa Magolima (BFT).

Akizungumzia maandalizi hayo, Mashaga alisema kuwa Tanzania ina matarajio makubwa kutokana na maandalizi mazuri na ari ya wachezaji waliochaguliwa.

“Tunakwenda Nairobi tukiwa na dhamira ya dhati ya kupima kiwango chetu na kuhakikisha tunaandaa timu imara kuelekea michezo ya Jumuiya ya Madola 2026. Kikosi hiki kina wachezaji wenye vipaji na uzoefu wa kutosha,” alisema.

Mashindano hayo yanatarajiwa kuwa kivutio kikubwa, huku Tanzania ikitarajia kufanya vizuri na kushinda medali ili kuendelea kujijengea heshima katika ramani ya ngumi za kimataifa.

SERIKALI YAPANIA KUANDAA WALIMU BORA KWA KARNE YA DIGITALI

KATIKA kuhakikisha mafunzo ya darasani yanaendana na mahitaji halisi ya soko la ajira, Katibu Mkuu wa Wizara ya Elimu, Sayansi na Teknolojia, Prof. Carolyne Nombo, amekutana na Afisa Mtendaji Mkuu wa Chama cha Waajiri Tanzania (ATE), Bi. Suzzane Ndomba, kwa mazungumzo ya namna ya kuwawezesha vijana wahitimu kupata mafunzo ya vitendo sehemu za kazi.

Mkutano huo umefanyika katika ofisi za ATE jijini Dar es Salaam, ambapo Prof. Nombo alisema Serikali imefanya mapitio ya Sera ya Elimu na kuboresha mitaala ya ngazi zote ili vijana wapate ujuzi unaowawezesha kujiajiri au kuajiriwa.

Aidha, Prof. Nombo alisisitiza kuwa Serikali inaendelea kutoa mafunzo kwa walimu walioko kazini ili kuboresha mbinu za ufundishaji, akieleza kuwa ufundishaji bora ndio msingi wa kuwajengea wanafunzi ujuzi wa maisha na ajira.

“Lengo la ziara hii ni kujadiliana na ATE kuhusu njia bora za kuwashirikisha waajiri katika kusaidia vijana waliopo vyuoni au waliomaliza masomo kupata mafunzo ya vitendo sehemu za kazi,” alisema Prof. Nombo.

Kwa upande wake, Afisa Mtendaji Mkuu wa Chama cha Waajiri Tanzania (ATE), Bi. Suzzane Ndomba, alisema ATE imekuwa ikisaidia wanafunzi kupata mafunzo kwa vitendo kupitia wanachama wake, wakiwemo viwanda na makampuni. Alitolea mfano wa Mradi wa Kukuza Ujuzi wa Vijana unaotekelezwa na ATE, uliowawezesha zaidi ya vijana 1,000 waliomaliza kidato cha nne kupata mafunzo ya miezi sita katika vyuo vya ufundi kabla ya kupelekwa makampuni kwa mafunzo ya vitendo, ambapo baadhi yao walipata ajira.

Aidha, alitoa wito kwa Watanzania kutumia Teknolojia ya Habari na Mawasiliano (TEHAMA) kujifunza ujuzi kwa gharama nafuu bila kujali kiwango cha elimu rasmi walichonacho.

Mazungumzo hayo yameonesha dhamira ya pamoja ya Serikali na sekta binafsi katika kuimarisha ujuzi wa vijana na kuandaa nguvu kazi yenye mchango katika maendeleo ya taifa.

DC NYAMWESE AANIKA FURSA ZA UWEKEZAJI HANDENI

 

Na Augusta Njoji, Handeni TC

MKUU wa Wilaya ya Handeni, Mhe. Salum Nyamwese, ametoa rai kwa sekta binafsi kuchangamkia fursa za biashara na uwekezaji katika sekta mbalimbali, ikiwamo viwanda vya kuchakata machungwa, ili kuchochea maendeleo ya wilaya hiyo.

Akifungua kikao cha Baraza la Biashara la Wilaya kilichofanyika mjini Handeni Septemba 23, 2025, Nyamwese ambaye pia ni Mwenyekiti wa Baraza hilo, amezitaka Halmashauri za Wilaya na Mji wa Handeni kupitia Maofisa Mipango kuandaa vitini vinavyoainisha maeneo ya uwekezaji, ili kurahisisha wawekezaji kubaini fursa zilizopo.

Amesema serikali imeendelea kuweka mazingira wezeshi ya uwekezaji na biashara, kwa lengo la kuchochea maendeleo ya Handeni na kupanua wigo wa ajira kwa vijana, kutokana na sensa ya watu na makazi ya mwaka 2022 kuonesha wilaya hiyo ina wakazi zaidi ya 400,000, ambapo asilimia 65 hadi 70 ni vijana.

“Wilaya yetu inakua kwa kasi, hivyo ukuaji huu ni fursa kwenu wafanyabiashara na wawekezaji. Nitoe wito kwenu kuwa wabunifu ili kuchochea maendeleo ya wilaya yetu. Hapa Handeni tuna fursa ya madini, tufungue milango ya uwekezaji,” amesema Nyamwese.

Akizungumzia sekta ya kilimo, Nyamwese amesisitiza kuendeleza mazao ya kimkakati ikiwamo mkonge, pamoja na uwekezaji kwenye viwanda vya machungwa kutokana na wilaya hiyo kuzalisha kwa wingi.

Aidha, katika sekta ya utalii, Mkuu huyo ametaka kuandaliwa mkakati wa kitaalamu wa kutunza vivutio vya utalii na vya kihistoria, ikiwamo eneo walilopotea kungwi na mwali, pamoja na nyumba aliyolala Baba wa Taifa, Hayati Mwalimu Julius Nyerere.

Amesisitiza pia umuhimu wa kuandaa makala maalum kuhusu maeneo ya kihistoria kwa kushirikisha wazee wa maeneo husika kutoa shuhuda zao.

Kwa upande wake, Mwenyekiti wa Chemba ya Wafanyabiashara Wilaya hiyo, Adolf Lyakundi amebainisha kuwa ushirikiano wa sekta ya umma na binafsi ndio msingi wa kuchochea maendeleo ya Handeni.

Naye, Mkurugenzi wa Halmashauri ya Mji Handeni, Maryam Ukwaju, amesema halmashauri hiyo imejipanga kuandaa Mpango kabambe wa Mji huo (Master Plan) kwa ajili ya kupanga na kupima ardhi ili kuimarisha mazingira bora ya uwekezaji. Wafanyabiashara waliokuwepo wameshukuru serikali kwa kuendelea kushughulikia changamoto zinazowakabili, wakisema hatua hiyo inawaongezea imani katika kuwekeza na kukuza biashara zao.

      

MARIAM IBRAHIM AWAOMBA WANANCHI WA BAGAMOYO KUMPIGIA KURA MGOMBEA URAIS DK. SAMIA

Na Mwandishi Wetu, Bagamoyo.

Mgombea Ubunge wa Viti Maalum Mkoa wa Pwani kupitia Chama Cha Mapinduzi (CCM), Mariam Ibrahim, amewataka wananchi wa Wilaya ya Bagamoyo kujitokeza kwa wingi siku ya uchaguzi na kumpigia kura Mgombea Urais Dk. Samia Suluhu Hassan pamoja na wagombea wengine wa chama hicho.

Akizungumza katika uzinduzi wa kampeni uliofanyika wilayani humo jana Septemba 17, 2025, Mariam alipiga magoti mbele ya wananchi akisisitiza mshikamano na mshikikano wa kisiasa kwa ajili ya maendeleo ya taifa.

Mariam alisema ni muhimu Rais Samia, Mgombea Ubunge wa Bagamoyo Subira Mgalu, na madiwani wa CCM katika kata mbalimbali wakapewa kura nyingi ili kuendeleza miradi ya maendeleo inayotekelezwa na serikali.

Aidha, aliwahimiza wanawake kushirikiana kikamilifu katika kampeni na kuhamasisha jamii nzima kujitokeza kwa wingi siku ya uchaguzi, akibainisha kuwa ushiriki wao ni nyenzo muhimu ya kuendeleza maendeleo ya Bagamoyo na taifa kwa ujumla.

USAJILI WA WAKULIMA WA TUMBAKU TABORA KUIMARISHA HUDUMA ZA BIMA

Mrajis na Mtendaji Mkuu wa TCDC, Dkt. Benson Ndiege, akizungumza kwenye kikao cha wadau wa Tumbaku kwa ajili ya kupitisha utaratibu wa utekelezaji na utoaji wa Bima ya Zao la Tumbaku kwa wakulima kupitia Ushirika kilichofanyika leo Septemba 17, 2025 jijini Dodoma.

Na Alex Sonna, Dodoma..

Wadau wa zao la tumbaku nchini wamekutana jijini Dodoma na kuweka mkakati wa kuhakikisha wakulima wanapata bima ya zao hilo kupitia vyama vyao vya ushirika, hatua inayolenga kuwalinda dhidi ya majanga na hasara zinazoweza kuathiri uzalishaji.

Kikao hicho kiliwahusisha Tume ya Maendeleo ya Ushirika Tanzania (TCDC), Shirikisho la Vyama vya Ushirika (TFC), Mamlaka ya Usimamizi wa Bima Tanzania (TIRA), Konsotia ya Bima za Kilimo (TAIC), taasisi za kifedha na wakuu wa wilaya za mkoa wa Tabora.

Akizungumza katika kikao hicho jana Septemba 17, 2025, jijini Dodoma, Mrajis na Mtendaji Mkuu wa TCDC, Dkt. Benson Ndiege, alisema hatua hiyo ni mwanzo wa kuhakikisha kila mkulima wa tumbaku anakuwa na bima ya mazao kabla ya kuanza msimu mpya wa kilimo.

“Usajili wa wakulima utaanza mara moja na takwimu zitakusanywa kwa manufaa ya wakulima, taasisi za kifedha na kampuni za bima. Tunataka mfumo wa bima uwe na tija na kulinda kipato cha mkulima,” alisema Dkt. Ndiege.

Aliongeza kuwa bima kwa wakulima kwa sasa ni jambo la lazima, kwani inawalinda wanapokumbwa na majanga, huku akisisitiza kuwa serikali imeweka mkakati wa kuhakikisha kila mkulima wa tumbaku anakuwa na bima ya mazao.

Kwa upande wake, Mkuu wa Wilaya ya Urambo, Dkt. Khamis Mkanachi, alisema usajili na bima kwa wakulima ni hatua ya kudhibiti mianya ya utoroshaji wa tumbaku na kuhakikisha wakulima wanapata maslahi kupitia vyama vyao vya ushirika.

“Kukamilika kwa usajili kutasaidia kudhibiti vitendo vya utoroshaji, kwa kuwa mkulima atakayekopeshwa kupitia chama cha ushirika atalazimika kuuza tumbaku yake kupitia chama hicho na si vinginevyo,” alisema Dkt. Mkanachi.

Wadau hao walisisitiza kuwa bima ya mazao ni nguzo muhimu ya kulinda ustawi wa wakulima na kuongeza tija ya kilimo, jambo litakalosaidia sekta ya tumbaku kuchangia zaidi katika pato la taifa.

Mrajis na Mtendaji Mkuu wa TCDC, Dkt. Benson Ndiege,akizungumza kwenye kikao cha wadau wa Tumbaku kwa ajili ya kupitisha utaratibu wa utekelezaji na utoaji wa Bima ya Zao la Tumbaku kwa wakulima kupitia Ushirika kilichofanyika leo Septemba 17,2025 jijini Dodoma.

Kamishna wa Bima Mamlaka ya Usimamizi wa Bima Tanzania (TIRA) - Dkt. Baghayo Saqware,akizungumza wakati wa kikao cha wadau wa Tumbaku kwa ajili ya kupitisha utaratibu wa utekelezaji na utoaji wa Bima ya Zao la Tumbaku kwa wakulima kupitia Ushirika kilichofanyika leo Septemba 17,2025 jijini Dodoma.

Mkuu wa Wilaya ya Urambo, Dkt. Khamis Mkanachi,akichangia mada wakati wa kikao cha wadau wa Tumbaku kwa ajili ya kupitisha utaratibu wa utekelezaji na utoaji wa Bima ya Zao la Tumbaku kwa wakulima kupitia Ushirika kilichofanyika leo Septemba 17,2025 jijini Dodoma.

Mkuu wa Wilaya ya Kaliua, Dkt Gerald Mongella,akichangia mada wakati wa kikao cha wadau wa Tumbaku kwa ajili ya kupitisha utaratibu wa utekelezaji na utoaji wa Bima ya Zao la Tumbaku kwa wakulima kupitia Ushirika kilichofanyika leo Septemba 17,2025 jijini Dodoma.

 

Wadau mbalimbali wakisikiliza hotuba ya Mrajis na Mtendaji Mkuu wa TCDC, Dkt. Benson Ndiege, (hayupo pichani) wakati wa kikao cha wadau wa Tumbaku kwa ajili ya kupitisha utaratibu wa utekelezaji na utoaji wa Bima ya Zao la Tumbaku kwa wakulima kupitia Ushirika kilichofanyika leo Septemba 17, 2025 jijini Dodoma.

 

Wadau mbalimbali wakisikiliza hotuba ya Mrajis na Mtendaji Mkuu wa TCDC, Dkt. Benson Ndiege,(hayupo pichani) wakati wa kikao cha wadau wa Tumbaku kwa ajili ya kupitisha utaratibu wa utekelezaji na utoaji wa Bima ya Zao la Tumbaku kwa wakulima kupitia Ushirika kilichofanyika leo Septemba 17, 2025 jijini Dodoma.

 

Wadau mbalimbali wakisikiliza hotuba ya Mrajis na Mtendaji Mkuu wa TCDC, Dkt. Benson Ndiege,(hayupo pichani) wakati wa kikao cha wadau wa Tumbaku kwa ajili ya kupitisha utaratibu wa utekelezaji na utoaji wa Bima ya Zao la Tumbaku kwa wakulima kupitia Ushirika kilichofanyika leo Septemba 17,2025 jijini Dodoma.

  

Wadau mbalimbali wakisikiliza hotuba ya Mrajis na Mtendaji Mkuu wa TCDC, Dkt. Benson Ndiege,(hayupo pichani) wakati wa kikao cha wadau wa Tumbaku kwa ajili ya kupitisha utaratibu wa utekelezaji na utoaji wa Bima ya Zao la Tumbaku kwa wakulima kupitia Ushirika kilichofanyika leo Septemba 17,2025 jijini Dodoma.

DIGITALI NA UTUMISHI: TUGHE YAANZA SAFARI MPYA YA MAPINDUZI YA KIKAZI

Na Mwandishi Wetu, Arusha.

Chama cha Wafanyakazi wa Serikali na Afya Tanzania (TUGHE) kimewakutanisha viongozi wa matawi na waajiri zaidi ya 800 kutoka taasisi 300 za serikali kwa ajili ya mafunzo ya siku tano yanayolenga kuwajengea uwezo kuhusu matumizi ya Akili Mnemba (AI) na teknolojia za kidijitali katika kuimarisha afya na usalama sehemu za kazi.

Mafunzo hayo yameanza leo, Septemba 15, 2025 jijini Arusha na yatahitimishwa Septemba 19, yakijikita pia kwenye mada za taratibu za uendeshaji wa mashauri ya kinidhamu ya watumishi wa umma, usuluhishi na maamuzi ya kiutumishi, pamoja na mchango wa mabaraza ya wafanyakazi katika kukuza tija.

Katibu Mkuu wa TUGHE, Hery Mkunda, alisema mafunzo hayo yanagusa maeneo mengi muhimu ikiwemo mapambano dhidi ya unyanyasaji wa kijinsia sehemu za kazi, afya ya akili na umuhimu wa emotional intelligence kwa viongozi na wafanyakazi.

Akifungua mafunzo hayo, Naibu Katibu Mkuu Ofisi ya Waziri Mkuu (Kazi, Vijana, Ajira na Wenye Ulemavu), Zuhura Yunus, aliipongeza TUGHE kwa ubunifu huo akisema unaleta tija kwa serikali, wafanyakazi na taasisi.

“Ninaamini baada ya mafunzo haya, migogoro kazini itapungua na tija itaongezeka, kwani yanalenga kuunganisha waajiri na wawakilishi wa wafanyakazi katika kuelewa sheria, taratibu na kanuni za utumishi wa umma,” alisema.

Kwa upande wake, Mwenyekiti wa TUGHE Taifa, Joel Kaminyoge, alisema lengo ni kutoa elimu ya kiutumishi, kuimarisha mahusiano mema kazini, kuongeza tija na kuimarisha utawala bora sambamba na kupunguza migogoro.

Mshiriki wa mafunzo hayo, Neema Swai, alisema elimu hiyo ni muhimu kwa viongozi wa matawi kwani itawasaidia kupunguza migogoro sehemu za kazi. Aliipongeza serikali kwa kuridhia mfanyakazi anapojifungua mtoto njiti kupewa likizo maalumu kuanzia wiki ya 40 ya ujauzito.

Mafunzo hayo pia yanakwenda sambamba na safari ya kitalii ya kupanda Mlima Kilimanjaro kwa washiriki, ikiwa ni sehemu ya kujifunza na kutangaza vivutio vya utalii nchini.

Mkurugenzi Mtendaji Wa Benki ya CRDB Atembelea Matawi na Kukutana Na Wateja

Mkurugenzi Mtendaji wa Benki ya CRDB, Abdulmajid Nsekela ameendelea na ziara zake katika baadhi ya matawi ya jijini Dar es Salaam kukutana na wateja ikiwa ni siku chache baada ya Benki kukamilisha maboresho makubwa ya mfumo wake mkuu wa utoaji huduma (Core Banking System).

Akiwa katika tawi la CRDB TPA lililopo katika jengo la Bandari jijini Dar es Salaam alikozungumza na mameneja wa matawi ya Kanda ya Dar es Salaam na Pwani pamoja na wanahabari, Nsekela alipata fursa pia ya kuzungumza na wateja waliokuwa wakihudumiwa. Aliwashukuru wateja kwa ushirikiano na uvumilivu wao katika kipindi cha mabadiliko huku akiwahakikishia kuwa huduma za Benki zinaendelea kuimarika kila siku tangu kuanza kutumika kwa mfumo mpya.

“Kuanzia tarehe 8 Septemba tulihamia kwenye mfumo mkuu wa utoaji huduma za benki ambapo, kwa ukubwa wa mabadiliko yaliyofanyika, baadhi ya wateja wetu walipata changamoto katika akaunti zao na baadhi ya miamala kutofanikiwa. Juhudi za wataalamu wetu zimefanyika usiku na mchana, na hadi jana akaunti zilizokuwa na changamoto zilirudi katika hali yake ya kawaida. Aidha, wateja ambao miamala yao ilikwama walirudishiwa fedha katika akaunti zao na miamala kuendelea kufanyika kwa ufanisi,” amesema Nsekela.

Aidha, Nsekela amebainisha kuwa uwekezaji mkubwa uliofanyika katika mfumo huu mpya umezingatia mahitaji ya sasa na ya baadaye ya wateja, na mabadiliko hayo yametekelezwa katika nchi zote ambako Benki ya CRDB inafanya biashara yaani Tanzania, Burundi na Jamhuri ya Kidemokrasia ya Congo (DRC) - huduma zinaendelea vizuri. Vilevile, ameongeza kuwa mageuzi hayo yanaweka msingi wa Benki kujitanua kimataifa, ambapo hivi karibuni Benki ya CRDB imepata leseni ya kuanzisha ofisi Dubai.

Katika hatua nyingine, Mkurugenzi Mtendaji amesema kuwa pamoja na mabadiliko yaliyotokea, Benki bado imeendelea kufanya vizuri kibiashara ikithibitisha imani kubwa ya wateja waliyonayo kwa Benki yao. Vilevile ametumia fursa hiyo kuwashukuru wafanyakazi wote kwa kujitoa kwao katika kipindi hiki cha mabadiliko na akawahimiza kuendelea kusimamia weledi katika utoaji huduma ili kuhakikisha mfumo mpya unaleta matokeo yaliyokusudiwa.

Mkurugenzi Mtendaji wa Benki ya CRDB Abdulmajid Nsekela (kushoto) akihudumia na kupokea maoni ya wateja kuhusu maboresho ya mfumo mkuu wa uendeshaji wa huduma yaliyofanyika hivi karibuni katika tawi la Benki ya CRDB TPA lililopo katika Jengo la bandari jijini Dar es Salaam.

 Mkurugenzi Mtendaji wa Benki ya CRDB, Abdulmajid Nsekela (katikati) akiangalia namna huduma zinavyotolewa kwa wateja kupitia mfumo mkuu wa uendeshaji wa huduma ulioanza kutumika hivi karibuni. Amefanya ukaguzi huo katika tawi la Benki ya CRDB TPA lililopo katika Jengo la bandari jijini Dar es Salaam alikotembelea kusikiliza na kupokea maoni ya wateja kuhusu maboresho ya yaliyofanyika hivi karibuni.

Mkurugenzi Mtendaji wa Benki ya CRDB, Abdulmajid Nsekela (kushoto) akimsikiliza Lella Mushi, mmoja wa mawakala wanaotoa huduma za Benki ya CRDB alipomkuta katika tawi la Benki ya CRDB TPA lililopo katika Jengo la bandari jijini Dar es Salaam alikotembelea ili kusikiliza na kupokea maoni ya wateja kuhusu maboresho ya mfumo mkuu wa uendeshaji wa huduma yaliyofanyika hivi karibuni.